بجا کہ ہے پاس حشر ہم کو کریں گے پاس شباب پہلے
بجا کہ ہے پاس حشر ہم کو کریں گے پاس شباب پہلے
حساب ہوتا رہے گا یا رب ہمیں منگا دے شراب پہلے
فضائے شب ہنس کے جگمگائی وہ نازنیں صبح بن کے آئی
ہوا ہے روشن مرے شبستاں میں چاند سے آفتاب پہلے
زباں پہ آیا نہ حرف مطلب کہ کہہ گئیں کچھ شریر نظریں
سوال کرنے نہ پائے ہیں ہم کہ مل گیا ہے جواب پہلے
جناں میں پہلے پیے گا تو لڑکھڑاتا پھرے گا زاہد
سرور کوثر کی ہے اگر دھن جہاں میں پی لے شراب پہلے
ہے خسرو عشق کا یہ فرماں کہ دل لگانا نہیں ہے آساں
جسے ہو کوئے بتاں کا ارماں وہ کو بہ کو ہو خراب پہلے
غم و الم رنج و یاس و حسرت اٹھاؤں گا سب کے رخ سے پردے
تمہیں قسم ہے دل حزیں کی اٹھاؤ تو تم نقاب پہلے
الٰہی وہ بوئے پیرہن سے بھی پہلے ہو ہمکنار آ کر
چمن میں ہوتا ہے جلوہ افروز پھول سے ماہتاب پہلے
یہ کس کے رنگ رخ بہاریں نے بخش دی ہے طراوت نو
شگفتہ ہوتا نہ تھا گلستاں میں اس ادا سے گلاب پہلے
نگاہ ساقی کی مسکرائی کہا جب اخترؔ نے اپنی دھن میں
پئیں گے پیتے رہیں گے مے کش مگر یہ خانہ خراب پہلے
اختر شیرانی 
(818) ووٹ وصول ہوئے
Baja Ki Hai Pas-e-hashr Hum Ko Karenge Pas-e-shabab Pahle In Urdu By Famous Poet Akhtar Shirani. Baja Ki Hai Pas-e-hashr Hum Ko Karenge Pas-e-shabab Pahle is written by Akhtar Shirani. Enjoy reading Baja Ki Hai Pas-e-hashr Hum Ko Karenge Pas-e-shabab Pahle Poem on Inspiration for Students, Youth, Girls and Boys by Akhtar Shirani. Free Dowlonad Baja Ki Hai Pas-e-hashr Hum Ko Karenge Pas-e-shabab Pahle by Akhtar Shirani in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends