Na Wo KHizan Rahi Baqi Na Wo Bahaar Rahi
na wo KHizan rahi baqi na wo bahaar rahi
rahi to meri kahani hi yaadgar rahi
wahi nazar hai nazar jo bain-hama pasti
sitara-gir rahi kahkashan shikar rahi
shab-e-bahaar mein taron se khelne wale
kisi ki aankh bhi shab bhar sitara-bar rahi
tamam umr raha garche main tahi-pahlu
basi hui mere pahlu mein bu-e-yar rahi
koi aziz na Thahra hamare dafn ke baad
rahi jo pas to shama sar-e-mazar rahi
wo phul hun jo khila ho KHizan ke mausam mein
tamam umr mujhe hasrat-e-bahaar rahi
kabhi na bhulengi us shab ki lazzaten 'aKHtar'
ki mere sine pe wo zulf-e-mushk-bar rahi
Akhtar Shirani 
(813) Peoples Rate This