Sina KHun Se Bhara Hua Mera
sina KHun se bhara hua mera
uf ye bad-mast mai-kada mera
na rasai pe naz hai jis ko
hae wo shauq-e-na-rasa mera
ishq ko munh dikhaunga kyunkar
hijr mein rang uD gaya mera
dil-e-gham-dida par KHuda ki mar
sina aahon se chhil gaya mera
yaad ke tund-o-tez jhonke se
aaj har dagh jal uTha mera
yaad-e-mazi azab hai yarab
chhin le mujh se hafiza mera
minnat-e-charKH se bari hun mein
na hua jite-ji bhala mera
hai baDa shaghl zindagi 'aKHtar'
puchhte kya ho mashghala mera
Akhtar Ansari 
(806) Peoples Rate This