Yahan Mausam Bhi Badlen To Nazare Ek Jaise Hain
yahan mausam bhi badlen to nazare ek jaise hain
hamare roz-o-shab sare ke sare ek jaise hain
hamein har aane wala zaKHm-e-taza de ke jata hai
hamare chand suraj aur sitare ek jaise hain
KHudaya tere dam se apna ghar ab tak salamat hai
wagarna dost aur dushman hamare ek jaise hain
kahin gar farq niklega to bas shiddat ka kuchh warna
yahan par gham hamare aur tumhaare ek jaise hain
main kis ummid pe daman kisi ka tham lun 'aKHtar'
ki sab se dosti mein ab KHasare ek jaise hain
Akhtar Amaan 
(1758) Peoples Rate This