Mulahiza Ho Meri Bhi UDan Pinjre Mein
mulahiza ho meri bhi uDan pinjre mein
ata hue hain mujhe do-jahan pinjre mein
hai sair-gah bhi aur is mein aab-o-dana bhi
rakha gaya hai mera kitna dhyan pinjre mein
is ek shart par us ne riha kiya mujh ko
rakhega rehn wo meri uDan pinjre mein
yahin halak hua hai parinda KHwahish ka
tabhi to hain ye lahu ke nishan pinjre mein
mujhe sataega tanhaiyon ka mausam kya
hai mere sath mera KHandan pinjre mein
falak pe jab bhi parindon ki saf nazar aai
hui hain kitni hi yaaden jawan pinjre mein
KHayal aaya hamein bhi KHuda ki rahmat ka
sunai jab bhi paDi hai azan pinjre mein
tarah tarah ke sabaq is liye raTae gae
main bhul jaun khula aasman pinjre mein
Akhilesh Tiwari 
(1731) Peoples Rate This