Tujhe Apna Banana Chahta Hun
tujhe apna banana chahta hun
magar KHud ko bhi pana chahta hun
tumhaari yaad ko dil mein basa kar
main sab kuchh bhul jaana chahta hun
zara meri taraf bhi ho tawajjoh
main haal-e-dil sunana chahta hun
jo har insan ko sarshaar kar de
main aisa git gana chahta hun
main Thukra kar jahan ki sari daulat
faqat ab tujh ko pana chahta hun
tumhein KHushiyan ata karne ki KHatir
main apna gham chhupana chahta hun
mohabbat zindagi hai apni 'ahsan'
yahi sab ko batana chahta hun
Ahsan Imam Ahsan 
(1107) Peoples Rate This