Ilm Ki Zarurat

jahan mein har taraf hai ilm hi ki garm-bazari

zamin se aasman tak bas isi ka faiz hai jari

yahi sar-chashma-e-asli hai tahzib-o-tamaddun ka

baghair is ke bashar hona bhi hai ek saKHt bimari

banata hai yahi insan ko kaamil-tarin insan

sikhata hai yahi aKHlaq o isar o rawa-dari

yahi qaumon ko pahunchata hai baam-e-auj-o-rifat par

yahi mulkon ke andar phunkta hai ruh-e-bedari

isi ke nam ka chalta hai sikka sare aalam mein

isi ke sar pe rahta hai hamesha taj-e-sardari

isi ke sab karishme ye nazar aate hain duniya mein

isi ke dam se raunaq aalam-e-imkan ki hai sari

ye la-silki, ye telephone ye railen, ye tayyare

ye zer-e-ab o baala-e-falak insan ki tarrari

hudud-e-istawa qutbain se yun ho gae mudgham

ki hai ab ruba maskon jaise ghar ki chaar-diwari

samundar ho gae payab sahra bin gae gulshan

kiya science ne bhi eataraf-e-ijz-o-nachaari

buKHar o barq ka jarrar lashkar hai ab aamada

ugalwa le zamin o aasman ki daulaten sari

gharaz chaaron taraf ab ilm hi ki baadshahi hai

ki us ke bazuon mein quwwat-e-dast-e-ilahi hai

nigah-e-ghaur se dekho agar haalat-e-insani

to ho sakta hai hal ye uqda-e-mushkil ba-asani

wahi qaumen taraqqi ke madarij par hain faeq-tar

ki hai jin mein tamaddun aur siyasat ki farawani

isi ke zoam mein hai germany charKH-e-tafaKHur par

isi ke zor par mirriKH ka ham-sar hai japani

isi ki quwwat-e-bazu pe hai maghrur america

isi ke bil par laDki ho rahi hai rustam-e-sani

ishaare par isi ke naql-o-harakat hai sab italy ki

isi ke taba-e-farman hain rusi o irani

isi ke jumbish-e-abru pe hai england ka gharra

isi ke hain sab aawurde francisi o albani

koi mulk ab nahin jin mein ye jauhar ho na raKHshanda

na ghafil is se chini hain na shami hain na afghani

baghair is ke jo rahna chahte hain is zamane mein

samajh rakkhen fana un ke liye hai hukm-e-rabbani

zamana phenk dega KHud unhen qar-e-halakat mein

wo apne hath se honge KHud apni qabr ke bani

zamane mein jise ho sahib-e-fath-o-zafar hona

zaruri hai use ilm-o-hunar se bahra-war hona

taraqqi ki khuli hain shahrahen dahr mein har su

nazar aata hai tahzib-o-tamaddun se jahan mamlu

chale jate hain uDte shahsawaran-e-falak-paima

KHiraj-e-tahniyat lete hue karte hue jadu

guzarte ja rahe hain dusron ko chhoDte pichhe

kabhi hota hai sahra mustaqar un ka kabhi Tapu

kamar bandhe hue din raat chalne par hain aamada

dimagh afkar se aur dil wufur-e-shauq se malul

alag rah kar KHayal-e-zahmat o ehsas-e-rahat se

lage hain apni apni fikr mein ba-KHatir-e-yaksu

magar hum hain ki aslan his nahin hum ko koi is ki

hamare pa-e-himmat in marahil mein hain be-qabu

jahan pahla qadam rakkha tha roz-e-awwalin hum ne

nahin sarke is apne asli markaz se ba-qadr-e-mu

ye haalat hai ki hum par band hai har ek darwaza

nazar aata nahin hargiz koi ummid ka pahlu

magar wa-hasrata phir bhi hum apne zoam-e-baatil mein

samajhte hain zamane bhar se aage KHud ko manzil mein

zarurat hai ki hum mein raushni ho ilm ki paida

nazar aae hamein bhi taki asl-e-haalat-e-duniya

hamein malum ho haalat ab kya hain zamane ke

hamare sath ka jo qafila tha wo kahan pahuncha

jo pasti mein the ab wo jalwa-gar hain baam-e-rifat par

jo baalak be-nishan the aaj hai in ka alam barpa

hamari KHubiyan sab dusron ne chhin lin hum se

zamane ne hamein itna jhinjhoDa kar diya nanga

rawa-dari, uKHuwwat, dosti, isar, hamdardi

KHayal-e-mulk-o-millat dard-e-qaum, andesha-e-farda

ye sab jauhar hamare the kabhi ai wae-mahrumi

bane hain KHubi-e-qismat se jo ab ghair ka hissa

agar ho jaen raghib ab bhi hum talim ki jaanib

to kar sakte hain ab bhi mulk mein hum zindagi paida

bahut kuchh waqt hum ne kho diya hai lekin is par bhi

agar chahen to kar den pesh-rau ko apne hum paspa

nikamma kar diya hai kahili ne go hamein lekin

ragon mein hai hamari KHun abhi tak dauDta phirta

koi maKHfi hararat gar hamare dil ko garma de

hamare jism mein phir zindagi ki ruh dauDa de

watan walo bahut ghafil rahe ab hosh mein aao

uTho be-dar ho aql-o-KHirad ko kaam mein lao

tumhaare qaum ke bachchon mein hai talim ka fuqdan

ye gutthi saKHt pechida hai is ko jald suljhao

yahi bachche bil-aKHir tum sabhon ke ja-nashin honge

tum apne samne jaisa unhen chaho bana jao

bahut hi ranj-dah ho jaegi us waqt ki ghaflat

kahin aisa na ho mauqa nikal jaane pe pachhtao

ye hai kar-e-aham do chaar is ko kar nahin sakte

KHuda-ra tum bhi apne farz ka ehsas farmao

ye bojh aisa nahin jis ko uTha len chaar chhe mil kar

sahaara do, sahaara dusron se is mein dilwao

jo zi-ehsas hain hasil karo tum KHidmaten un ki

jo zi-parwa hain un ko jis tarah ho us taraf lao

gharaz jaise bhi ho jis shakl se bhi ho ye lazim hai

tum apne qaum ke bachchon ko ab talim dilwao

agar tum mustaiddi ko bana loge shiar apna

yaqin jaano ki mustaqbil hai behad shandar apna

KHudawanda! duaon mein hamari ho asar paida

shab-e-ghaflat hamari phir kare nur-e-sahar paida

hamare sare KHwabida qawa be-dar ho jaen

sar-e-nau ho phir in mein zindagi ki karr-o-farr paida

hamein ehsas ho hum kaun the aur aaj hum kya hain

karen mahaul-e-mulki ke liye gahri nazar paida

mila rakkha hai apne jauhar-e-kaamil ko miTTi mein

hum ab bhi KHak se kar sakte hain lal-o-guhar paida

agar chahen to hum mushkil watan ki dam mein hal kar den

hazaron suraten kar sakte hain hum kargar paida

ba-zahir go hum ek tuda hain bilkul rakh ka lekin

agar chahen to KHakistar se kar den sau sharar paida

watan ka nakbat o aflas kho den hum ishaare mein

jahan Thokar laga den ho wahin se kan-e-zar paida

hum is manzil ke aaKHir par pahunch kar bil-yaqin dam len

agar kuchh taza-dam ho jaen apne ham-safar paida

jo koshish muttahid ho kar kahin ek bar ho jae

yaqin hai mulk ki qismat ka beDa par ho jae