Koi Mazi Ke Jharokon Se Sada Deta Hai
koi mazi ke jharokon se sada deta hai
sard paDte hue shoalon ko hawa deta hai
dil-e-afsurda ka har gosha chhanak uThta hai
zehn jab yaadon ki zanjir hila deta hai
haal-e-dil kitna hi insan chhupae yaro
haal-e-dil us ka to chehra hi bata deta hai
kisi bichhDe hue khoe hue hamdam ka KHayal
kitne soe hue jazbon ko jaga deta hai
ek lamha bhi guzar sakta na ho jis ke baghair
koi us shaKHs ko kis tarah bhula deta hai
waqt ke sath guzar jata hai har ek sadma
waqt har zaKHm ko har gham ko miTa deta hai
Ahmad Rahi 
(1296) Peoples Rate This