KhaDe Hain Dil Mein Jo Barg-o-samar Lagae Hue
khaDe hain dil mein jo barg-o-samar lagae hue
tumhaare hath ke hain ye shajar lagae hue
bahut udas ho tum aur main bhi baiTha hun
gae dinon ki kamar se kamar lagae hue
abhi sipah-e-sitam KHema-zan hai chaar taraf
abhi paDe raho zanjir-e-dar lagae hue
kahan kahan na gae aalam-e-KHayal mein hum
nazar kisi ke dar-o-baam par lagae hue
wo shab ko chir ke suraj nikal bhi lae
hum aaj tak hain ummid-e-sahar lagae hue
dilon ki aag jalao ki ek umr hui
sada-e-nala-e-dud-o-sharar lagae hue
Ahmad Mushtaq 
(1318) Peoples Rate This