Barae-zeb Usko Gauhar-o-aKHtar Nahin Lagta
barae-zeb us ko gauhar-o-aKHtar nahin lagta
wo KHud ek chand hai aur chand ko zewar nahin lagta
KHudaya yun bhi ho ki us ke hathon qatl ho jaun
wahi ek aisa qatil hai jo pesha-war nahin lagta
agar aariz-parasti ka amal ek jurm banta hai
saza bhi kaT lenge kaTne se Dar nahin lagta
mohabbat tir hai aur tir baatin chhed deta hai
magar niyyat ghalat ho to nishane par nahin lagta
rais-e-shahr ho kar bhi wo itna jhuk ke milta hai
ki us ke samne koi bhi qad-awar nahin lagta
Ahmad Kamal Parwazi 
(799) Peoples Rate This