Kabhi Tumne Kuchh To Diya Nahin Kabhi Humne Kuchh To Liya Nahin
kabhi tum ne kuchh to diya nahin kabhi hum ne kuchh to liya nahin
hamein zindagi se ho bahs kya koi waqia to hua nahin
magar aisi koi KHalish bhi thi jo faqat hamara nasib thi
ki jo rog hum ne laga liya kisi aur ko to laga nahin
zara dekhna ki wo kaun hai pas-e-ramz-e-wahshat-e-ashiqi
bhala kis ne hum ko shikast di kabhi pahle aisa hua nahin
jise pas aana tha aa gaya aur nafas ke tar bhi juD gae
ki talab ki thin yahi manzilen koi fasla to raha nahin
baDi wusaten hain zamin par hamein aur chahiye kya magar
wo jo husn us ki nazar mein hai koi us se baDh kar mila nahin
wo jo mil chuki hain aziyyaten chalo man len ki bahut hua
magar ab mila hai jo hausla kisi aur ko to mila nahin
Ahmad Hamesh 
(819) Peoples Rate This