Yun To Pahle Bhi Hue Us Se Kai Bar Juda
yun to pahle bhi hue us se kai bar juda
lekin ab ke nazar aate hain kuchh aasar juda
gar gham-e-sud-o-ziyan hai to Thahar ja ai jaan
ki isi moD pe yaron se hue yar juda
do ghaDi us se raho dur to yun lagta hai
jis tarah saya-e-diwar se diwar juda
ye judai ki ghaDi hai ki jhaDi sawan ki
main juda girya-kunan abr juda yar juda
kaj-kulahon se kahe kaun ki ai be-KHabron
tauq-e-gardan se nahin turra-e-dastar juda
ku-e-jaanan mein bhi KHasa tha tarah-dar 'faraaz'
lekin us shaKHs ki saj-dhaj thi sar-e-dar juda
Ahmad Faraz 
(4195) Peoples Rate This