Shoala Tha Jal-bujha Hun Hawaen Mujhe Na Do
shoala tha jal-bujha hun hawaen mujhe na do
main kab ka ja chuka hun sadaen mujhe na do
jo zahr pi chuka hun tumhin ne mujhe diya
ab tum to zindagi ki duaen mujhe na do
ye bhi baDa karam hai salamat hai jism abhi
ai KHusrawan-e-shahr qabaen mujhe na do
aisa na ho kabhi ki palaT kar na aa sakun
har bar dur ja ke sadaen mujhe na do
kab mujh ko e'tiraf-e-mohabbat na tha 'faraaz'
kab main ne ye kaha hai sazaen mujhe na do
Ahmad Faraz 
(2493) Peoples Rate This