Wo Nazar Mehrban Agar Hoti
wo nazar mehrban agar hoti
zindagi apni mo'tabar hoti
nafraton ke tawil sahra mein
in ki chahat to ham-safar hoti
ai shab-e-gham mere muqaddar ki
tere daman mein ek sahar hoti
lamha lamha aziyyaten hain jahan
yaad hi un ki chaara-gar hoti
un se mansub ho gae warna
zindagi kis tarah basar hoti
hum hi 'aghaz' garm-e-sahra the
zulf kya saya-e-shajar hoti
Aghaz Barni 
(729) Peoples Rate This