Maskan Wahin Kahin Hai Wahin Aashiyan Kahin
maskan wahin kahin hai wahin aashiyan kahin
do aaDe sidhe rakh liye tinke jahan kahin
phulon ki sej phulon ki hain baddhiyan kahin
kanTon pe hum taDapte hain o aasman kahin
jate kidhar ho tum saf-e-mehshar mein KHair hai
daman na ho KHuda ke liye dhajjiyan kahin
pahra biTha diya hai ye qaid-e-hayat ne
saya bhi sath sath hai jaun jahan kahin
bas mujh ko dad mil gai mehnat wasul hai
sun le ghazal ye bulbul-e-hindustan kahin
'shair' wo aaj phir wahin jate hue mile
dushman ke sar pe TuT paDe aasman kahin
Agha Shayar Qazalbash 
(865) Peoples Rate This