Pur-nur Jis Ke Husn Se Madfan Tha Kaun Tha
pur-nur jis ke husn se madfan tha kaun tha
chehra ye kis shahid ka raushan tha kaun tha
Thahra gaya hai la ke jo manzil mein ishq ki
kya jaane rahnuma tha ki rahzan tha kaun tha
toDa tha kis ke dil ko khilaune ki tarah se
aashiq tumhaara jab ki laDakpan tha kaun tha
kis dil se hai KHudai mein ijad dard-e-ishq
roz-e-azal jo mujid-e-shewan tha kaun tha
hu ka maqam tha mujhe roti thi be-kasi
koi na tha jahan mera madfan tha kaun tha
jhuk jhuk ke dekhta tha wo kis ki jigar ka ghaw
tar jis ke KHun mein yar ka daman tha kaun tha
hum muskuraate the wo dikhata tha sair-e-bagh
dam kis pe shefta dam-e-murdan tha kaun tha
insan tha ki koi pari-zad tha 'sharaf'
dil mera jis ke nur se raushan tha kaun tha
Agha Hajju Sharaf 
(809) Peoples Rate This