Main Apne Dil Mein Nai KHwahishen Sajae Hue
main apne dil mein nai KHwahishen sajae hue
khaDa hua hun hawa mein qadam jamae hue
nae jahan ki tamanna mein ghar se nikla hun
hatheliyon pe nai mishalen jalae hue
hawa ke phul mahakne lage mujhe pa kar
main pahli bar hansa zaKHm ko chhupae hue
na aandhiyan hain na tufan na KHun ke sailab
hain KHushbuon mein manazir sabhi nahae hue
pighal gai hain achanak ghamon ki zanjiren
gire hain dhup ke neze badan churae hue
dikha rahi hai nai zindagi ke naqsh-e-qadam
sukun ki nind gale se mujhe lagae hue
chaTaKHne wali zamin dur rah gai 'afzal'
hain sare khet sitaron ke lahlahae hue
Afzal Minhas 
(858) Peoples Rate This