Mere Liye Sahil Ka Nazara Bhi Bahut Hai
mere liye sahil ka nazara bhi bahut hai
girdab mein tinke ka sahaara bhi bahut hai
dam-saz mila koi na sahra-e-junun mein
DhunDa bhi bahut hum ne pukara bhi bahut hai
apni rawish-e-lutf pe kuchh wo bhi musir hain
kuchh talKHi-e-gham hum ko gawara bhi bahut hai
anjam-e-wafa dekh len kuchh aur bhi ji ke
sunte hain KHayal un ko hamara bhi bahut hai
kuchh ras bhi aati nahin 'afsar' ko masarrat
kuchh ye ki wo haalat ka mara bhi bahut hai
Afsar Mahpuri 
(863) Peoples Rate This