GanThi Hai Usne Dosti Ek Pesh-imam Se
ganThi hai us ne dosti ek pesh-imam se
'adil' uTha lo hath dua-o-salam se
pani ne rasta na diya jaan-bujh kar
ghote lagae phir bhi rahe tishna-kaam se
main us gali se sar ko jhukae guzar gaya
chilghoze phenkti rahi wo mujh pe baam se
wo kaun tha jo din ke ujale mein kho gaya
ye chand kis ko DhunDne nikla hai sham se
kone mein baadshah paDa unghta raha
Table pe raat kaT gai begam ghulam se
nashsha sa Dolta hai tere ang ang par
jaise abhi bhigo ke nikala ho jam se
Adil Mansuri 
(934) Peoples Rate This