Waswase Dil Mein Na Rakh KHauf-e-rasan Le Ke Na Chal
waswase dil mein na rakh KHauf-e-rasan le ke na chal
azm-e-manzil hai to ham-rah thakan le ke na chal
rah-e-manzil mein bahr-e-haal tabassum farma
har qadam dukh sahi mathe pe shikan le ke na chal
nur hi nur se wabasta agar rahna hai
sar pe suraj ko uTha sirf kiran le ke na chal
pahle faulad bana jism ko apne ai dost
barish-e-sang mein shisha sa badan le ke na chal
aas insaf ki munsif se nahin hai to na rakh
na-umidi ki magar dil mein chubhan le ke na chal
Abrar Kiratpuri 
(984) Peoples Rate This