Kuchh Na Kiya Arbab-e-junun Ne Phir Bhi Itna Kaam Kiya
kuchh na kiya arbab-e-junun ne phir bhi itna kaam kiya
dar-ba-dar uftad se khele zulf-ba-zulf aaram kiya
sawan shoale bhaDke gulshan gulshan aag lagi
kaisa suraj ubhra jis ne subh ko aatish-nam kiya
tanhai bhi sannaTe bhi dil ko Daste jate hain
rahgiro kis des mein aa kar hum ne aaj qayam kiya
qarya-e-gul se dasht-e-bala tak ahl-e-hawas ki yurish thi
kuchh to samajh kar diwanon ne tark-e-jada-e-am kiya
raat ke hathon kab tak rahta shahr-e-nigaran tira-o-tar
apne lahu se hum ne charaghan aaKHir gam-ba-gam kiya
aish bhi guzre ranj bhi guzre dil ki haalat ek rahi
kab jashn-e-aghaz manaya kab KHauf-e-anjam kiya
'mir' ke gyani lakhon dekhe 'mir' si kis mein baat 'uruj'
meri biti aap ne kah len KHud ko abas badnam kiya
Abdur Rauf Urooj 
(1116) Peoples Rate This