Jo Sare Ham-safar Ek Bar Harz-e-jaan Kar Len
jo sare ham-safar ek bar harz-e-jaan kar len
to jis zamin pe qadam rakkhen aasman kar len
ishaara karti hain maujen ki aaega tufan
chalo hum apne iradon ko baadban kar len
paron ko joD ke uDne ka shauq hai jin ko
unhen batao ki mahfuz aashiyan kar len
jo qatl tu ne kiya tha bana ke mansuba
tere sitam ko baDhaen to dastan kar len
dahakte shoalon pe chalne ka shauq hai jin ko
ruton ki aag mein wo hausle jawan kar len
ye un se kah do agar imtihan ki zid hai
samundaron ki tarah dil ko be-karan kar len
har ek bund ka lenge hisab hum 'alwi'
hamare KHun se dil ko wo shadman kar len
Abbas Alvi 
(1245) Peoples Rate This