Dur Hai Manzil To Kya Rasta To Hai
dur hai manzil to kya rasta to hai
ek nazar us ne mujhe dekha to hai
chand hathon mein nahin to kya hua
aasman par hi sahi dikhta to hai
KHush agar ghairon mein hai to KHush rahe
wo kahin bhi ho chalo achchha to hai
kuchh nahin hai aur to gham hi sahi
is bhari duniya mein kuchh apna to hai
aaj wo yun hi nahin mujh se KHafa
kuchh gila to hai koi shikwa to hai
kiya bharosa us ke wade ka magar
dil ke KHush rakhne ko ek wada to hai
us ne rakkha hai takalluf ka bharam
ab adawat par koi parda to hai
aa raha hai wo bhi aaKHir rah par
sun ke mera zikr kuchh kahta to hai
dil nahin 'azim' chalo jaan hi sahi
KHair us ne mujh se kuchh manga to hai
Aazim Kohli 
(1338) Peoples Rate This