Wahan Pahunch Ke Ye Kahna Saba Salam Ke Baad
wahan pahunch ke ye kahna saba salam ke baad
ki tere nam ki raT hai KHuda ke nam ke baad
wahan bhi wada-e-didar is tarah Tala
ki KHas log talab honge bar-e-am ke baad
gunahgar ki sun lo to saf saf ye hai
ki lutf-e-rahm-o-karam kya phir intiqam ke baad
talab tamam ho matlub ki agar had ho
laga hua hai yahan kuch har maqam ke baad
wo KHat wo chehra wo zulf-e-siyah to dekho
ki sham subh ke baad aae subh sham ke baad
payam-bar ko rawana kiya to rashk aaya
na ham-kalam ho us se mere kalam ke baad
abhi to dekhte hain zarf baada-KHwaron ka
subu o KHum ki bhi Thahregi daur-e-jam ke baad
ilahi 'asi'-e-betab kis se chhuTa hai
ki KHat mein roz-e-qayamat likha hai nam ke baad
Aasi Ghazipuri 
(1628) Peoples Rate This