Kitne Hi PeD KHauf-e-KHizan Se UjaD Gae
kitne hi peD KHauf-e-KHizan se ujaD gae
kuchh barg-e-sabz waqt se pahle hi jhaD gae
kuchh aandhiyan bhi apni muawin safar mein thin
thak kar paDaw Dala to KHeme ukhaD gae
ab ke meri shikast mein un ka bhi hath hai
wo tir jo kaman ke panje mein gaD gae
suljhi thin gutthiyan meri danist mein magar
hasil ye hai ki zaKHmon ke Tanke ukhaD gae
nirwan kya bas ab to aman ki talash hai
tahzib phailne lagi jangal sukaD gae
is band ghar mein kaise kahun kya tilism hai
khole the jitne qufl wo honTon pe paD gae
be-saltanat hui hain kai unchi gardanen
bahar saron ke dast-e-tasallut se dhaD gae
Aanis Moin 
(1495) Peoples Rate This